Saifuddin Saif
chain ab mujh ko tah-e-dam to lene dete
tere fitne kahin aram to lene dete
aap ne is ka taḌapna bhi gavara na kiya
dil-e-muztar se koi kaam to lene dete
maut bhi bas men nahin hai tire majburon ki
zindagi men koi ilzam to lene dete
pal men manzil pe uḌa laa.e fana ke jhonke
lutf rah rah ke bahar-gam to lene dete
haath bhi teri nigahon ne uThane na diya
dil-e-betab zara thaam to lene dete
‘saif’ har baar isharon men kiya us ko ḳhitab
log us but ka mujhe naam to lene dete
Leave a Reply