duriyan hi duriyan hain qurbaton ke bavajud
ajnabi hain sab qaribi nisbaton ke bavajud
rang-o-bu se jaan to kaghaz men paḌ sakti nahin
kaghzi gul kaghzi hain nik.haton ke bavajud
saḳhti-e-sahra-navardi hi masarrat-baḳhsh hai
dil nahin lagta qafas men rahaton ke bavajud
be-hisi be-ghairati bhi juzv-e-fitrat ban ga.i
hans raha huun anjuman men zillaton ke bavajud
kar diya badnam yusuf se farishte ko magar
pak-daman hai zuleḳha tohmaton ke bavajud
khol kar baiTha huun main ab bhi mohabbat ki dukan
nafraton ke fa.ede ki san.aton ke bavajud
barq se Dar ke nasheman se na uḌ kar ja.iye
baiThe rahiye shaḳh-e-gul par dahshaton ke bavajud
zehn men barpa hai ‘kausar’ mahsharistan-e-ḳhayal
kab hai tanha.i mayassar ḳhalvaton ke bavajud
Leave a Reply