chahiye ishq men is tarah fana ho jaana
jis tarah aankh uThe mahv-e-ada ho jaana
kisi mashuq ka ashiq se ḳhafa ho jaana
ruuh ka jism se goya hai juda ho jaana
maut hi aap ke bimar ki qismat men na thi
varna kab zahr ka mumkin tha dava ho jaana
apne pahlu men tujhe dekh ke hairat hai mujhe
ḳharq-e-adat hai tira vaada vafa ho jaana
vaq.at-e-ishq kahan jab ye talavvun ho vahan
kabhi raazi kabhi ashiq se ḳhafa ho jaana
jab mulaqat hui tum se to takrar hui
aise milne se to behtar hai juda ho jaana
chheḌ kuchh ho ki na ho baat hui ho ki na ho
baiThe baiThe unhen aata hai ḳhafa ho jaana
mujh se phir jaae jo duniya to bala se phir jaae
tu na ai aah zamane ki hava ho jaana
‘ahsan’ achchha hai rahe mal-e-arab pesh-e-arab
de ke dil tum na giraftar-e-bala ho jaana
Leave a Reply