kamal-e-husn hai husn-e-kamal se bahar
azal ka rang hai jaise misal se bahar
to phir vo kaun hai jo mavara hai har shai se
nahin hai kuchh bhi yahan gar ḳhayal se bahar
ye ka.enat sarapa javab hai jis ka
vo ik saval hai phir bhi saval se bahar
hai yaad ahl-e-vatan yuun ki reg-e-sahil par
giri hui koi machhli ho jaal se bahar
ajiib silsila-e-rang hai tamanna bhi
had-e-uruj se aage zaval hai bahar
na us ka ant hai koi na isti.ara hai
ye dastan hai hijr-o-visal se bahar
dua buzurgon ki rakhti hai zaḳhm ulfat ko
kisi ilaaj kisi indimal se bahar
bayan ho kis tarah vo kaifiyat ki hai ‘amjad’
miri talab se faravan majal se bahar
Leave a Reply