aag zaḳhmon ki jala kar dekho
ji ko ik rog laga kar dekho
kitni ma.asum hai rudad-e-hayat
ḳhud ko aaseb bana kar dekho
shikva-e-nim-nigahi hai ghalat
phir to chehra hi mila kar dekho
kya kahen lafz-e-mohabbat hai garan
dil ke auraq uTha kar dekho
kitne chehre hain naqab-aluda
lau charaghon ki baḌha kar dekho
apni bichhḌi hui tanha.i se
kyuun na ik baar vafa kar dekho
bahti maujon ko qarar aa jaa.e
naghma-e-dard suna kar dekho
kitne shaffaf hain yadon ke badan
tum inhen haath laga kar dekho
dil ki jannat ko sukun kuchh to mile
dasht-o-sahra hi basa kar dekho
bistar-e-gul pe bahut raat ga.e
koi sota hai jaga kar dekho
un makanon men makin koi nahin
vaise zanjir hila kar dekho
naam apna bhi kahin hai ki nahin
mera divan uTha kar dekho
Leave a Reply