dil ko zara qarar tha vo bhi nahin raha
ankhon ko intizar tha vo bhi nahin raha
vo saath tha to saath men meri bhi zaat thi
mera kahin shumar thaa, vo bhi nahin raha
us se hue juda to phir ḳhud ko bhi kho diya
ḳhud par jo e’tibar tha vo bhi nahin raha
daman men koi chand, sitara na aftab
jugnu par inhisar tha vo bhi nahin raha
jheli thiin jis ke sang hi ye ranjishen kabhi
ik dal hi gham-gusar tha vo bhi nahin raha
uljha tha mere dil men jo muddat se ik saval
lab par jo baar baar tha vo bhi nahin raha
jis par charagh rose jalati thi raat ko
dil men jo ik mazar tha vo bhi nahin raha
muddat se us ki raah men dil tha bichha hua
sochon men vasl-e-yar tha vo bhi nahin raha
taqdir ki asiir huun jis ke liye ye dil
muddat se ashk-bar tha vo bhi nahin raha
maabud mere mera muqaddar tu dekh le
ḳhud par jo iḳhtiyar tha vo bhi nahin raha