Saima Nasim Bano
chaha hai ajab dhang se chahat bhi ajab hai
mahbub ajab hai ye mohabbat bhi ajab hai
pallu mira thama hai kai baar khirad ne
par in dinon jazbon ki baghavat bhi ajab hai
jakda hai tiri yaad ne afkar ko mere
hamdam tire jazbat men shiddat bhi ajab hai
qurbat ke hasin phuul miri ruuh pe vaare
kya khuub sakhi hai ye sakhavat bhi ajab hai
ik ariz-e-gul par jama shabnam sa vo qatra
kirnon se zara qabl rifaqat bhi ajab hai
lahja tira dhakka hua lagta hai ghazab ka
ghusse-bhare lahje men hararat bhi ajab hai
chehra tira tapta hua dikhta hai tapish se
masti-bhare nainon men shararat bhi ajab hai
baazi kabhi haari nahin zalim ne ana ki
chalen bhi ajab us ki siyasat bhi ajab hai
khud qaid-e-vafa kaat ke di us ko rihai
‘bano’ ye tire dil ki adalat bhi ajab hai
Leave a Reply