chaah thi mehr thi mohabbat thi
us ki har baat hi qayamat thi
vasl tha qurb tha qarabat thi
dil ko phir bhi ajiib vahshat thi
ab to ham soch kar bhi hanste hain
avval-e-ishq kaisi halat thi
main bahut ḳhush raha huun us ke baghair
us ko is baat par bhi hairat thi
bas use chumte hi chhoḌ diya
pattharon se mujhe to vahshat thi
main to kuchh in dinon pareshan tha
us ko kab bhulne ki aadat thi
main hi us vaqt tujh se bachhḌa tha
jab tiri chahaton men shiddat thi
Leave a Reply