meer-taqi-meer

Chaak Par Chaak Hua Jun Jun Sulaya Humne

chaak par chaak hua juun juun sulaya ham ne

is gareban hi se ab haath uthaya ham ne

hasrat-e-lutf-e-azizan-e-chaman ji men rahi

sar pe dekha na gul-o-sarva ka saaya ham ne

ji men tha arsh pe ja bandhiye takiya lekin

bistara khaak hi men ab to bichhaya ham ne

baad yak umr kahin tum ko jo tanha paaya

Darte Darte hi kuchh ahval sunaya ham ne

yaan faqat rekhta hi kahne na aae the ham

chaar din ye bhi tamasha sa dikhaya ham ne

baare kal baagh men ja murgh-e-chaman se mil kar

khubi-e-gul ka maza khuub udaya ham ne

tazgi daagh ki har shaam ko be-hech nahin

aah kya jaane diya kis ka bujhaya ham ne

dasht-o-kohsar men sar maar ke chande tujh bin

qais-o-farhad ko phir yaad dilaya ham ne

bekali se dil-e-betab ki mar guzre the

so tah-e-khak bhi aram na paaya ham ne

ye sitam taaza hua aur ki paiz men ‘mir’

dil khas-o-khar se na-char lagaya ham ne

More Poems

Leave a Comment