Syed Ahmed Shameem
kitne jug biit ga.e phir bhi na bhula jaa.e
main jahan ja.un mire saath vo chehra jaa.e
raat ab lauT chali niind se jaaga jaa.e
apne kho.e hue suraj ko pukara jaa.e
ye damakte hue ruḳhsar chamakti ankhen
zindagi kar chuke ab Duub ke dekha jaa.e
ab ke tufan men ho jaa.e na reza reza
jism ki TuTti divar ko thama jaa.e
mohtasib shahr men mizan liye phirte hain
ham gunahgar hain is shahr se bhaga jaa.e
apne hi dil men kabhi jhank ke dekho mujh ko
main koi raaz nahin huun jise samjha jaa.e
le ke shishe men chalo atish-e-sayyal ‘shamim’
qazi-e-shahr ke iman ko parkha jaa.e
Leave a Reply