Poet
burrish-e-tegh bhi hai phuul ki mahkar bhi hai
vo ḳhamoshi ki jo sad maujib-e-iz.har bhi hai
chhoḌiye un ke shab-o-roz ki rudad-e-zubun
aap ko ḳhak-nashinon se sarokar bhi hai
maslahat mujh ko bhi malhuz hai ai ham-suḳhano
par mire pesh-e-nazar vaqt ki raftar bhi hai
maut ke ḳhauf se har saans ruki jaati hai
zindagi aaj koi tera ḳharidar bhi hai
talḳhi-e-hal ko hai ishrat-e-farda ka fareb
dil junun-kosh hai aur aql trahdar bhi hai
mere mahbub mujhe vaqf-e-taghaful na samajh
ziist ke laakh taqaze hain tera pyaar bhi hai
ahal-e-guftar ki to bhiiḌ lagi hai ‘aḳhtar’
dekhna in men koi sahab-e-kirdar bhi hai
Leave a Reply