Ismail Merathi
itna to jante hain ki bande khuda ke hain
aage havas gum khirad-e-na-rasa ke hain
mamnun-e-barg-e-gul hain na sharminda-e-saba
ham bulbul aur hi chaman-e-dil-kusha ke hain
kya kohkan ki koh-kani kya junun-e-qais
vadi-e-ishq men ye maqam ibtida ke hain
bunyan-e-umr sust hai aur muniman-e-dahr
maghrur apne ko shak-e-ali bina ke hain
apne vajud ka abhi uqda khula nahin
masruf hill-o-aqd main arz-o-sama ke hain
shaikh aur barhaman men agar laag hai to ho
donon shikar-e-ghamza usi dil-ruba ke hain
jin ko inayat-e-azali se hai chashm-dasht
vo mo’taqid dua ke na qaael dava ke hain
laaya nahin hunuz naved-e-visal-e-dost
ham shikva-sanj susti-e-paik-e-saba ke hain
samjho agar to hain vahi sab se haris-tar
talib khuda se jo dil-e-be-muddaa ke hain
un bad-dilon ne ishq ko bad-nam kar diya
jo murtakib shikayat-e-jaur-o-jafa ke hain
himmat huma-e-auj-e-saadat hai mard ko
ullu hain vo jo shefta zill-e-huma ke hain
hai ashk-o-ah raas hamare mizaj ko
yaani pale hue isi ab-o-hava ke hain
jo bandhte hain turra-e-tarrar ka khayal
nadan umid-var nuzul-e-bala ke hain
khatka bhi kuchh hua nahin aur dil uda liya
ye saare hathkande tiri zulf-e-dota ke hain
said-e-karishma is liye hote nahin ki ham
pahle se zakhm-khurda fareb-e-vafa ke hain
maara bhi aur maar ke zinda bhi kar diya
ye shoabde to shokhi-e-naz-o-ada ke hain
khalvat men bhi rava nahin gustakhi-e-nigah
parde pade hue abhi sharm-o-haya ke hain
yuun kah rahi hai nargis-e-bimar ki ada
nuskhe to mujh ko yaad hazaron shifa ke hain
ab tak hai sajda-gah-e-azizan-e-rozgar
jis khaak par nishan tire kafsh-e-pa ke hain
andesha hai ki de na idhar ki udhar laga
mujh ko to na-pasand vatire saba ke hain
sair-e-varud-e-qafila-e-nau-bahar dekh
barpa khiyam auj-e-hava men ghata ke hain
jaata hai khak-e-pak-e-deccan ko ye rekhta
vaan qadr-dan is guhar-e-be-baha ke hain
ahbab ka karam hai agar nukta-chin na hon
varna ham aap mo’tarif apni khata ke hain
Leave a Reply