Burida Gesuon Mein Aankh Ka Rasta Nahin Tha

burīda gesuoñ meñ aañkh kā rasta nahīñ thā

vo chehra ḳhūbsūrat thā magar dekhā nahīñ thā

maiñ jab sāhil pe utrā ḳhalq merī muntazir thī

ka.ī din ho ga.e the bādshāh miltā nahīñ thā

bulāte the hameñ injīr aur zaitūn ke phal

magar vaadī meñ jaane kā koī rasta nahīñ thā

tanā yāqūt kā shāḳheñ zamurrad kī banī thiiñ

samar la.al-o-gohar the naḳhl kā saaya nahīñ thā

paroñ meñ aa.ine minqār meñ tāj-e-shahī thā

parinda qaaf se aayā magar uḌtā nahīñ thā

Leave a Comment