Maratib Akhtar
bulandiyon se vo be-dagh nuur ubhar aa.e
hazar rang tahi vus.aton men bhar aa.e
khile nigah ki shaḳhon pe intizar ke phuul
hava men uḌte hue badban nazar aa.e
labon se bichhḌe hue qahqahe tiri manind
ruten guzar ga.iin lekin na lauT kar aa.e
bujhi bujhi hui ankhen bhanvar bhanvar chehre
jab aftab ki lau bujh rahi thi ghar aa.e
buland-o-past pahaḌon ke silsilon ki tarah
ham apne aap ko bhi muntashir nazar aa.e
nadi nasheb-numa uljhanon men Duub ga.i
nihan sukut tah-e-ab se ubhar aa.e
Leave a Reply