Main Tumhein Phul Kahun Tum Mujhe KHushbu Dena

maiñ tumheñ phuul kahūñ tum mujhe ḳhushbū denā

mere baazū meñ zarā pyaar se baazū denā

aarzū chāñd kī hai zarf se baḌh kar lekin

terī fayyāzī kī tauhīn hai jugnū denā

har qadam mujh ko charāġhoñ kī zarūrat hogī

aap to zād-e-safar meñ mujhe aañsū denā

sabr ta.amīr kī buniyād hai rabbā mere

mujh ko biphre hue jazbāt pe qaabū denā

apne a.amāl kī tausīf meñ masrūf hai vo

ahl-e-insāf zarā us ko tarāzū denā

Leave a Comment