Poet
bashar ki zaat men shar ke siva kuchh aur nahin
ye baat naqs-e-nazar ke siva kuchh aur nahin
hayat ki shab-e-tarik ḳhatm hoti hai
qaza tulu-e-sahar ke siva kuchh aur nahin
jo dekhiye to kaf-e-gul-farosh bhi hai hayat
ghalat ki daman-e-tar ke siva kuchh aur nahin
guzar ke had se har ik shai bar-aks hoti hai
kamal-e-aib-e-hunar ke siva kuchh aur nahin
ye rang jo nazar aata hai chehra-e-gul par
hamare ḳhun-e-jigar ke siva kuchh aur nahin
bashar hai jauhar-e-kirdar se garan-maya
guhar men ab-e-guhar ke siva kuchh aur nahin
nazar-fareb nazare jahan ke ai ‘fazil’
fareb-e-husn-e-nazar ke siva kuchh aur nahin
Leave a Reply