Anjum Khaleeq
biite hue lamhat ko pahchan men rakhna
murjha.e hue phuul bhi gul-dan men rakhna
kya janen safar ḳhair se guzre ki na guzre
tum ghar ka pata bhi mire saman men rakhna
kya din the mujhe shauq se mehman bulana
aur ḳhud ko magar ḳhidmat-e-mehman men rakhna
kya vaqt tha kya vaqt hai is soch se hasil
chhoḌo jo hua kya use mizan men rakhna
insan ki niyyat ka bharosa nahin koi
milte ho to is baat ko imkan men rakhna
pursish hai bahut saḳht vahan fard-e-amal ki
kuchh na.at ke ash.ar bhi divan men rakhna
muḳhlis ho raho Toka hai kis ne tumhen ‘anjum’
raftar-e-zamana bhi magar dhyan men rakhna
Leave a Reply