Bismil Kisi Ko Rakhna Rasm-E-Wafa Nahin Hai

bismil kisi ko rakhna rasm-e-vafa nahin hai

aur munh chhupa ke chalna shart-e-vafa nahin hai

zulfon ko shana kiije ya bhaun bana ke chaliye

gar paas dil na rakhiye to ye ada nahin hai

ik roz vo sitamgar mujh se hua mukhatib

main ne kaha ki pyare ab ye rava nahin hai

marte hain ham tadapte phirte ho tum har ik ja

jaana ki tum ko ham se kuchh muddaa nahin hai

tab sun ke shokh dilkash jhunjhla ke kahne laaga

kya vaza meri ‘asif’ tu janta nahin hai

Leave a Comment