Etibar Sajid
ghar ki dahliz se bazar men mat aa jaana
tum kisi chashm-e-kharidar men mat aa jaana
khaak udana inhin galiyon men bhala lagta hai
chalte phirte kisi darbar men mat aa jaana
yunhi khushbu ki tarah phailte rahna har su
tum kisi dam-e-talabgar men mat aa jaana
duur sahil pe khade rah ke tamasha karna
kisi ummid ke manjdhar men mat aa jaana
achchhe lagte ho ki khud-sar nahin khuddar ho tum
haan simat ke but-e-pindar men mat aa jaana
chand kahta huun to matlab na ghalat lena tum
raat ko rauzan-e-divar men mat aa jaana
Leave a Reply