bina sahar ke ujale mujhe qubul nahin
tire ye jhuTe dilase mujhe qubul nahin
na tu madari hai na main tira jamura huun
ye aa.e din ke tamashe mujhe qubul nahin
baḌha ke haath ko tum ne mujhe giraya hai
agar yahi hain sahare mujhe qubul nahin
kisi ke zehn ki jo khiḌkiyan na khol saken
to aise ilm ke da.ave mujhe qubul nahin
jo mere dil pe hai guzri vahi agar na kaho
to baaqi shor-sharabe mujhe qubul nahin
ho zulm aam jahan par jahan na haq pahunche
ye bhule-bhaTke zamane mujhe qubul nahin
Leave a Reply