Apne Ka Hai Gunah Begane Ne Kya Kiya

apne ka hai gunah begane ne kya kiya

is dil ko kya kahun ki divane ne kya kiya

yaan tak satana muj ko ki ro ro kahe tu haae

yaaro na tum suna ki fulane ne kya kiya

parda to raz-e-ishq se ai yaar uth chuka

be-sud ham se munh ke chhupane ne kya kiya

ankhon ki rahbari ne kahun kya ki dil ke saath

kuche ki us ke raah batane ne kya kiya

kaam aai kohkan ki mashaqqat na ishq men

patthar se ju-e-shir ke laane ne kya kiya

tuk dar tak apne aa mire naseh ka haal dekh

main to divana tha pe siyane ne kya kiya

chahun main kis tarah ye zamane ki dosti

auron se dost ho ke zamane ne kya kiya

kahta tha main gale ka tire ho padunga haar

dekha na gul ko sar pe chadhane ne kya kiya

‘sauda’ hai be-tarah ka nasha jam-e-ishq men

dekha ki us ko munh ke lagane ne kya kiya