Bin Mange Mil Raha Ho to KHwahish Fuzul Hai

bin māñge mil rahā ho to ḳhvāhish fuzūl hai

sūraj se raushnī kī guzārish fuzūl hai

kisī ne kahā thā TuuTī huī naav meñ chalo

dariyā ke saath aap kī ranjish fuzūl hai

nābūd ke surāġh kī sūrat nikāliye

maujūd kī numūd o numā.ish fuzūl hai

maiñ aap apnī maut kī tayyāriyoñ meñ huuñ

mere ḳhilāf aap kī sāzish fuzūl hai

ai āsmān terī ināyat bajā magar

fasleñ pakī huī hoñ to bārish fuzūl hai

jī chāhtā hai kah duuñ zamīn o zamāñ se maiñ

manzil agar nahīñ hai to gardish fuzūl hai

in.ām-e-nañg-o-nām mire kaam ke nahīñ

majzūb huuñ so merī satā.ish fuzūl hai

Leave a Comment