bigḌi hui jo bazm-e-suḳhan thi sanbhal ga.i
kya baat thi jo meri zaban se nikal ga.i
kyon ho ga.i hain donon ki rahen alag alag
main vo nahin raha ki ye duniya badal ga.i
va.ada vo apne aane ka puura na kar saka
shayad shab-e-firaq koi chaal chal ga.i
ye meri tarbiyat ka karishma na ho koi
aulad meri mujh se bhi aage nikal ga.i
tha jo yaqin nuzul-e-bala ka nujumi ko
mujh ko yaqin hai ‘shauq’ dua se vo Tal ga.i
Leave a Reply