Bhul Jate Hain Taqaddus Ke Hasin Pal Kitne

bhuul jaate hain taqaddus ke hasin pal kitne

log jazbat men ho jaate hain pagal kitne

rose khushbu ke muqaddar men rahi khud-sozi

apni hi aag men jalte rahe sandal kitne

sabz mausam na yahan phir se palat kar aaya

ho gae zard mire gaanv ke pipal kitne

khud-kushi qatl-e-ana tark-e-tamanna bairag

zindagi tere nazar aane lage hal kitne

barishen hoti hain jis vaqt bhari ankhon ki

raakh ho jaate hain jalte hue anchal kitne

har qadam koi darinda koi khunkhar uqaab

shahr ki god men abad hain jangal kitne

be-rukhi us ki rulaegi lahu kya ‘shabnam’

zakhm khate hi rahe ham to musalsal kitne

Leave a Comment