aao taqdir ko tadbir bana kar dekhen
in andheron ko ujalon se mila kar dekhen
aaj zalim ko bhi majbur bana kar dekhen
hashr se pahle hi ik hashr uTha kar dekhen
in buton se to koi kaam na nikla apna
ḳhair ab yunhi sahi yad-e-ḳhuda kar dekhen
chand-taron men jo abad hue jaate hain
vo kisi dil men bhi ghar apna bana kar dekhen
kaun apna hai yahan kaun hai begana ‘ziya’
dhajjiyan ham bhi to daman ki uḌa kar dekhen
Leave a Reply