Tafzeel Ahmad
ik pareshani alag thi aur pashemani alag
umr bhar karte rahe ham duudh aur paani alag
ret hi donon jagah thi zer-e-mehr-o-zer-e-ab
misra-e-ula se kab tha misra-e-sani alag
dasht men pahle hi raushan thi babulon par bahar
de rahe hain shahr men kanTon ko sab paani alag
kuchh kumak chahi to zambil-e-hava ḳhali mili
ghaTiyon men kho gaya naqsh-e-sulaimani alag
ret samjhaute ki ḳhatir nachti hai dhuup men
badalon ki zid juda hai meri man-mani alag
mudda.i hain barf baalu raat kanTe tap hava
jism par hai faujdari jaan pe divani alag
vo falak sangit men miTTi ki dhun to kya hua
saregama se kahin hota hai padhani alag
fan men taqat-var bahav chashm-e-do-aba ka hai
‘zeb-ghauri’ se kahan ‘tafzil’ hain ‘bani’ alag
Leave a Reply