Khwaja Ali Husain
bheja hua hai aur na bulaya hua hai dard
mehman ban ke dil men samaya hua hai dard
ankhon se ik jhaḌi hai musalsal lagi hui
lagta hai ashiqi ka sataya hua hai dard
ham hain jaza-e-tira-shabi men gundhe hue
apni raza se dil se lagaya hua hai dard
jaise mila.e rind-e-ḳharabat mai se mai
ham ne bhi sham-e-gham men milaya hua hai dard
jis ishtiha-e-ishq ko sadiyan guzar ga.iin
mushkil se is maqam pe laaya hua hai dard
din karha-e-mashq-e-zamana men kaaT kar
shab ki riyazaton se kamaya hua hai dard
pahle pahal to dard vara-e-guman tha
aur ab surur-e-zabt ka bhaya hua hai dard
ik fard-e-na-shanas ki chahat men ‘abdi’
muddat hui ki dil ne bhulaya hua hai dard
Leave a Reply