Faisal Azeem
bhari hai aag jebon men kaf-e-afsos malte hain
hamari hi kama.i se hamare haath jalte hain
mire atraf men ye khincha-tani kam nahin hoti
idhar pahlu badalta huun udhar jaale badalte hain
kisi ko bhi vo angara dikha.i hi nahin deta
ishare se batata huun to apne haath jalte hain
main apne jism se bahar huun ya ruhon ka maskan hai
unhen main chhu nahin paata jo mere saath chalte hain
hamare chaak par uqba ka.i shaklen badalti hai
ye jannat aur jahannum to hamare saath chalte hain
nazar-andaz karke sab guzar jaate hain mujh men se
nafi karte hue mujh men ka.i raste nikalte hain
sada ban kar bahut Takra.e hain minar-o-gumbad se
ab ankhen khul ga.i hain to andhere se nikalte hain
Leave a Reply