Gham Ke Maron Ka Hai Sahaara Chand

ġham ke māroñ kā hai sahārā chāñd

kitnā achchhā hai kitnā pyārā chāñd

zard chehra hai chāñdnī phīkī

kahīñ furqat kā ho na maarā chāñd

tū har ik kā hai aur kisī kā nahīñ

log kahte raheñ hamārā chāñd

ham jahāñ jaa.eñ jis taraf jaa.eñ

saath rahtā hai ye dil-ārā chāñd

baḌh ga.ī aur dil kī betābī

jaane kyā kar gayā ishārā chāñd

ham tire paas ḳhud chale aa.e

terī duurī nahīñ gavārā chāñd

rāt-bhar saath thā magar ‘nādir’

sub.h-dam kar gayā kinārā chāñd

Leave a Comment