Bhara Ghar Hai Koi Sahra Nahin Hai

bharā ghar hai koī sahrā nahīñ hai

yahāñ lekin koī apnā nahīñ hai

ġhazab hai ho gayā bargad bhī īñdhan

buzurgoñ kā kahīñ saaya nahīñ hai

musībat meñ bhī dāmān-e-sharāfat

hamāre haath se chhūTā nahīñ hai

tamāshā.ī huuñ yuuñ apne ġhamoñ kā

ki jaise dard-o-ġham dekhā nahīñ hai

mohabbat kī kiran phūTī hai dil se

kitāboñ se use sīkhā nahīñ hai

yahī ehsās dil ko Das rahā hai

tū merā ho ke bhī merā nahīñ hai

‘shahāb’ ash.ār tere paḌh ke dekhe

haqīqat hai koī qissa nahīñ hai

Leave a Comment