Shariq Kaifi
be-takalluf mira haijan banata hai mujhe
samne tere kahan bolna aata hai mujhe
vo udasi ki bikharne se nahin bach sakta
aur tira lams ki chunta chala jaata hai mujhe
ab mire lauT ke aane ka koi vaqt nahin
yuun bhi ab ghar se siva kaun bulata hai mujhe
giit hi sirf labon par ho to aa jaa.e bhi niind
vo koi aur kahani bhi sunata hai mujhe
qat.a kar ke bhi ta.alluq vo kahan chain se hai
is ke asbab-o-dala.el bhi ginata hai mujhe
ḳhud se vo kaun se shikve hain ki jaate hi nahin
apne jaison pe yaqin kyuun nahin aata hai mujhe
aur ik baar zara chheḌ miri ruuh ke taar
in suron men to koi aur bhi gaata hai mujhe
ik tira dard hai achchhe hain marasim jis se
bas vahi hai ki jo palkon pe biThata hai mujhe
main kisi dusre pahlu se use kyuun sochun
yuun bhi achchha hai vo jaisa nazar aata hai mujhe
ho sabab kuchh bhi mire aankh bachane ka magar
saaf kar duun ki nazar kam nahin aata hai mujhe
na-ḳhudaon ne to ḳhush-fahmiyan baḳhshi hain faqat
main huun ḳhatre men ye tufan hi batata hai mujhe
Leave a Reply