Be-Takalluf Bosa-E-Zulf-E-Chalipa Lijiye

be-takalluf bosa-e-zulf-e-chalipa lijiye

naqd-e-dil maujud hai phir kyuun na sauda lijiye

dil to pahle le chuke ab jaan ke khvahan hain aap

is men bhi mujh ko nahin inkar achchha lijiye

paanv pakad kar kahti hai zanjir-e-zindan men raho

vahshat-e-dil ka hai iima rah-e-sahra lijiye

ghair ko to kar ke zid karte hain khane men sharik

mujh se kahte hain agar kuchh bhuuk ho kha lijiye

khush-numa chizen hain bazar-e-jahan men be-shumar

ek naqd-e-dil se ya-rab mol kya kya lijiye

kushta akhir atish-e-furqat se hona hai mujhe

aur chande surat-e-simab tadpa lijiye

fasl-e-gul ke aate hi ‘akbar’ hue behosh aap

kholiye aankhon ko sahib jam-e-sahba lijiye

Leave a Comment