Sewak Nayyar
be-ruḳhi se na pesh aa saaqi
TuuT ja.ega dil mira saaqi
bhuul ja.un main ranj-o-gham saare
aaj aisa nasha pila saaqi
mai-kashon se hijab kya ma.ani
samne be-naqab aa saaqi
aah maazi mira hasin maazi
lauT kar ab na aa.ega saaqi
raaz meri siyah-baḳhti ka
kaun jaane mire siva saaqi
dasht-e-gham men bhaTak gaya huun main
raah koi mujhe dikha saaqi
dair-o-ka.aba men ghuum kar ‘nayyar’
teri mahfil men aa gaya saaqi
Leave a Reply