Nomaan Shauque
bata.un kaise ki sach bolna zaruri hai
ta.alluqat men ye tajraba zaruri hai
nazar haTa bhi to sakti hai kam-nazar duniya
vahin hai bhiiḌ jahan taḳhliya zaruri hai
tire baghair koi aur ishq ho kaise
ki mushrikon ke liye bhi ḳhuda zaruri hai
nahin to shahr ye so ja.ega sada ke liye
mujhe ḳhabar hai mira bolna zaruri hai
kisi ko hota nahin yuun mohabbaton ka yaqin
charagh bujh ke bata.e hava zaruri hai
main ḳhud ko bhulta jaata huun aur aise men
tira pukarte rahna baḌa zaruri hai
vo meri ruuh ki avaz sun raha hoga
badan rahe na rahe rabta zaruri hai
Leave a Reply