bastiyan viran hongi kasrat-e-ta.amir se
ye khanDar ubhre hain duniya men isi tadbir se
koh bhi karte hain zahir shiddat-e-jazbat ko
zalzale aate hain aksar garmi-e-tahrir se
meri qismat ke sitare astin men hain miri
ab qadam niklenge bahar halqa-e-taqdir se
ab ke socha tha karen kuchh ham bhi zaḳhmon ka ilaaj
kar ga.e mausam davaon ko juda tasir se
ek ik lamhe se milta hai yahi ham ko shu.ur
ik sadi ho ja.enge pichhe zara taḳhir se
zindagi Thahra havaon men ye lahron ka nizam
saari duniya raqs men hai ek hi zanjir se
yuun hua mahsus dil ko jab mila sanson ka lams
har badan vaqif nahin hai dhuup ki tasir se
hain yahi ni۔nden to koi chhin le ni۔nden ‘nazar’
ḳhvab se pahle hon vaqif ḳhvab ki ta.abir se
Leave a Reply