Poet
bas-ki didar tira jalva-e-quddusi hai
daman-e-vasl bhi aluda-e-mayusi hai
hai kahan bu-e-vafa us dahan-e-shirin men
ghuncha-lab teri zaban ham ne bahut chusi hai
yaar go khuun mira misl-e-hina ho pamal
lekin apne taiin manzur qadam-bosi hai
dil mira khaak shagufta ho chaman men ja kar
gul men ye rang kahan ek tiri bu si hai
ek din zulf ke munh par na chadhi ye kafir
yad-e-kakul ko faqat sheva-e-jasusi hai
vo saji tegh ki dam men kare lakhon ko qatl
kaun kahta hai miyan teri kamar mu si hai
shaikh rota hai ise sun ke barhaman yaksu
pur-asar bas ki mira nala-e-naqusi hai
chashm-e-namnak ne az bas-ki bujhaya us ko
atish-e-ishq kahan dil men magar lu si hai
ai ‘fughan’ ishq kahan dil men ba-qaul-e-‘minnat’
haan ye sach milne ki khuban se to ik khu si hai
Leave a Reply