ban kar jo koi samne aata hai aa.ina
ḳheme men dil ke aa ke lagata hai aa.ina
vo kaun hai ye mujh se kabhi puchhta nahin
main kaun huun ye mujh ko batata hai a.ina
is aks ke bar-aks koi aks hai kahin
kyon aks ko bar-aks dikhata hai aa.ina
ḳhud ko saja.e jaate hain vo aa.ine ko dekh
jalvon se un ke ḳhud ko sajata hai aa.ina
ḳhud aa.ine pe un ki Thaharti nahin nazar
kaise phir un se aankh milata hai aa.ina
ye mera aks hai to magar ajnabi sa hai
kyon kar mujhe mujhi si chhupata hai aa.ina
kab dil ke aa.ine men khila karte hain gulab
kab aa.ine men phuul khilata hai aa.ina
aveza dekhte hain vo jhuk kar qarib se
ya un ko koi raaz batata hai aa.ina
jab mera aks mujh se mumasil nahin raha
kyon mera aks mujh ko dikhata hai aa.ina
is aa.ine men aks kisi ka hai rat-din
‘ahmad’ ye ishq dil ko banata hai aa.ina
Leave a Reply