Bambai

sabz-o-shadab sahil

ret ke aur paani ke giit

muskurate samundar ka sayyal chehra

chand suraj ke tukde

lakhon aine maujon men bikhre hue

kashtiyan badbanon ke anchal men apne saron ko chhupae hue

jaal niile samundar men Duube hue

khaak par sukhti machhliyan

ghatnen pattharon ki vo tarshi hui muraten

elephanta ke gharon se jo raqs karti nikal aai hain

raten ankhon men jaadu ka kajal lagae hue

shamen niili hava ki nami men nahai hui

subhen shabnam ke barik malbus pahne hue

khvab-alud kohsar ke silsile

jangalon ke ghane saae

mitti ki khushbu

mahakti hui konplen

pattharon ki chattanen

apni banhon ko bahr-e-arab men samete hue

vo chatanon pe rakkhe hue unche unche mahl

chikni divaron par

qatl, gharat-gari, buzdili, nafaa-khori ki parchhaiyan

reshmi sariyan

makhmalin jism, zahrile nakhunon ki billiyan

khuun ki pyaas khadi ke pairahanon men

jagmagate hue qumqume, park, baghat aur museum

sang-e-marmar ke but, dhaat ke aadmi

sard o sangin azmat ke paikar

ankhen be-nur, lab be-sada, haath be-jan

hind ki bebasi aur mahkumi ki yadgaren

saikdon saal ke garm atish-kade

zar o sandal ki aag

ud-o-ambar ke shole

”chalen” iflas ki gard, tarikiyan

gandagi aur ufunat

ghure sadte hue

rahguzaron pe sote hue aadmi

taat par, aur kaghaz ke tukdon pe phaile hue jism, sukhe hue haath

zakhm ki astinon se nikli hui haDDiyan

kodhiyon ke hujum

”kholiyan” jaise andhe kuen

garm sinon, mohabbat ki godon se mahrum bachche

bakriyon ki tarah rassiyon se bandhe

un ki maaen abhi kar-khanon se vapas nahin aai hain

chimniyan bhutniyon ki tarah baal khole hue

kar-khane garajte hue

khuun ki aur pasine ki bu men sharabor

khuun sarmaya-dari ke nalon men bahta hua

bhattiyon men ubalta hua

sard sikkon ki surat men jamta hua

sone chandi men tabdil hota hua

bank ki khidkiyon men charaghan

sadken din raat chalti hui

saans leti hui

aadmi khvahishon ke andhere nashebon men sailab ki tarah bahte hue

chor-bazar, satta, juari

race ke ghode, sarkar ke mantari

cinema, ladkiyan, actor, maskhare

ek ik chiiz bikti hui

gajaren, muliyan, kakdiyan

jism aur zehn aur shaeri

ilm, hikmat, siyasat

ankhdiyon aur honton ke nilam-ghar

arizon ki dukanen

bazuon aur sinon ke bazar

pinDliyon aur ranon ke godam

desh-bhagti ke dalal khadi ke byopari

aql, insaf, pakizgi, aur sadaqat ke tajir

ye hai hindostan ki urusul-bilad

sar-zamin-e-dakan ki dulhan bambai

ek jannat jahannam ki aghosh men

ya ise yuun kahun

ek dozakh hai firdaus ki god men

ye mira shahr hai

go mira jism is khak-dan se nahin

meri mitti yahan se bahut duur ganga ke paani se gundhi gai hai

mere dil men himala ke phulon ki khushbu basi hai

phir bhi ai bambai tu mira shahr hai

tere baghat men meri yadon ke kitne hi ram-khurda aahu

main ne tere pahadon ki thanDi hava khaai hai

teri shaffaf jhilon ka paani piya hai

tere sahil ki hansti hui sipiyan mujh ko pahchanti hain

nariyal ke darakhton ki lambi qataren

tere niile samundar ke tufan aur qahqahe

tere dilkash mazafat ke sabza-zaron ki khamoshiyan

rangaten, nikhaten, sab mujhe janti hain

is jagah mere khvabon ko ankhen milin

aur meri mohabbat ke boson ne apne hasin hont hasil kiye

bambai

tere siine men sarmae ka zahr bhi

inqalab aur baghavat ka tiryaq bhi

tere pahlu men faulad ka qalb hai

teri nabzon men mazdur o mallah ka khuun hai

teri aghosh men kar-khanon ki duniya basi hai

sevri, lal-bagh aur parel

aur yahan tere bete tiri betiyan

in ki dikhti hui ungliyan

suut ke ek ik taar se

mulk ke qatilon ka kafan bun rahi hain

Leave a Comment