bala na.i koi palun agar ijazat ho
junun ko shauq bana luun agar ijazat ho
nigar-ḳhana-e-hasti ke a.inon men zara
main apna aks saja luun agar ijazat ho
sharab-e-husn men masti hai be-niyazi ki
ḳhudi ke shishe men Dhalun agar ijazat ho
hamari tum se mulaqat ho bhi sakti hai
main koi raah nikalun agar ijazat ho
bahut dinon se hain uryan-badan ḳhayal mire
rida-e-harf uḌha luun agar ijazat ho
vo tishnagi jise tum salsabil kahte ho
labon pe main bhi uTha luun agar ijazat ho
nazar zuhur ke jin tajrabon se guzri hai
kabhi kisi ko bata luun agar ijazat ho
kisi se dil hi nahin mil saka ‘shahab’ to ab
nazar tumhi se mila luun agar ijazat ho
Leave a Reply