Ye Jabr-E-Zindagi Na uThaen to Kya Karen

Siraj Lakhnavi

ye jabr-e-zindagi na uTha.en to kya karen

taḌpen magar taḌapne na paa.en to kya karen

ab apni mahfilon se bhi aati hai bu-e-ghair

jaa.en to kya karen jo na jaa.en to kya karen

qismat men apni sub.h ki ab raushni kahan

ashkon ke bhi diye na jala.en to kya karen

kitni hi raten jaag ke ankhon men kaaT diin

bedariyan bhi ḳhvab dikha.en to kya karen

vo rang-o-bu ke qafile raste hon jin ke band

divar-e-bagh phand na paa.en to kya karen

kanTon ke din bhi phir ga.e raas aa ga.i bahar

chhini ga.iin gulon ki qaba.en to kya karen

girta hai har palak ke jhapakne pe ik hijab

ankhon ko intizar sikha.en to kya karen

har raushni ‘siraj’ charagh-e-haram nahin

is sat.h par nigah ko laa.en to kya karen