baithe to paas hain par aankh utha sakte nahin
ji laga hai pa abhi haath laga sakte nahin
duur se dekh vo lab katte hain apne honth
hai abhi pas-e-adab honth hila sakte nahin
takte hain us qad o rukhsar ko hasrat se aur aah
bhench kar khuub sa chhati se laga sakte nahin
dil to in paanv pe lote hai mira vaqt-e-khiram
shab ko duzdi se bhi par un ko daba sakte nahin
chor se raat khade rahte hain is dar se lage
par jo matlub hai vo jins chura sakte nahin
rijhte un ki adaon pe hain kya kya lekin
maare andeshe ke gardan bhi hila sakte nahin
dekh rahte hain vo aina-e-zanu us ka
par kisi shakl se zaanu ko bhida sakte nahin
qaede kya hamen maalum nahin ulfat ke
be-kam-o-kast magar un ko padha sakte nahin
chipke tak rahte hain rang us ka bhabuka sa ham
aah par dil ki lagi apni bujha sakte nahin
kya ghazab hai ki vahi bole to bole az-khud
ham unhen kyuun ki bulaven ki bula sakte nahin
garche ham-khana hain ‘jurat’ pa hamare aise
bakht soe ki kahin saath sula sakte nahin
Leave a Reply