bahut suljhi hui baton ko bhi uljhae rakhte hain
jo hai kaam aaj ka kal tak use latkae rakhte hain
taghaful sa rava rakhte hain us ke samne kya kya
magar andar hi andar taba ko lalchae rakhte hain
hamari justuju se dur-tar hai manzil-e-maani
usi ko khoe rakhna hai jise ham paae rakhte hain
hamari aarzu apni samajh men bhi nahin aati
pajama is tarah ka hai jise ultae rakhte hain
havaen bhuul kar bhi is taraf ka rukh nahin kartin
so ye shakh-e-tamasha aap hi tharrae rakhte hain
isi ki raushni hai aur isi men bhasm hona hai
ye shola shaam ka jo raat bhar bhadkae rakhte hain
ham itni raushni men dekh bhi sakte nahin us ko
so apne aap hi is chand ko gahnae rakhte hain
nasheb-e-shairi men hai hamari zaat se raunaq
yahi patthar hai jis ko raat din ludhkae rakhte hain
ye ghar jis ka hai us ne vapas aana hai ‘zafar’ is men
isi khatir dar-o-divar ko mahkae rakhte hain
Leave a Reply