Mansoor Khushtar
bahut bar-e-garan ye zindagi ma.alum hoti hai
ki gham ka pesh-ḳhema har ḳhushi ma.alum hoti hai
kisi se sarguzisht-e-gham bayan karta huun jab apni
kahani vo sarasar aap ki ma.alum hoti hai
hai mahrumi si mahrumi to majburi si majburi
ki har saa.at musibat men ghiri ma.alum hoti hai
chala huun jis pe ik muddat raha huun ashna jis se
vo manzil, rahguzar ab ajnabi ma.alum hoti hai
kahan ja.un main ai ‘ḳhushtar’ kahun rudad bhi kis se
ki jis ko dekhiye jaan par bani ma.alum hoti hai
Leave a Reply