bagulon ki safen kirnon ke lashkar samne aa.e
qadam uTThe jidhar zaḳhmon ke patthar samne aa.e
thakan se TuuT kar jab ḳhvab-e-rahat ki tamanna ki
rida-e-gham liye kanTon ke bistar samne aa.e
darida badban kamzor kashti raat tufani
dahan khole syahi ke samundar samne aa.e
talash-e-ab-e-haivan men jahan mere qadam pahunche
vahan zahrab se labrez saghar samne aa.e
gharib-e-shahr kis ke astane par sada deta
ka.i ghar raah men dekhe ka.i dar samne aa.e
mire ḳhuddar lab par jab kabhi lafz-e-ana aaya
miri qimat lagane kisa-e-zar samne aa.e
mizaj aisa hai kuchh ‘mahir’ muravvat aa hi jaati hai
koi shatir agar ma.asum ban kar samne aa.e
Leave a Reply