baḌi ibrat ki manzil hai zamin gor-e-ghariban ki
yahan apni haqiqat par nazar paḌti hai insan ki
yahi dhun thi kahin mera dil-e-gum-gashta mil jaa.e
isi vahshat men barson ḳhaak chhani ku-e-janan ki
jahan nabzen rukin dil sard ho do hichkiyan aa.iin
samajh liije ki manzil aa ga.i gor-e-ghariban ki
na ja.ega mere dil se ḳhayal-e-abru-e-dil-bar
ki teghon hi ke saa.e men to hai jannat musalman ki
fana-e-ishq ho kar zinda-e-javed hota hai
miTa kar dekhiye hasti nahin miTti hai insan ki
yahan rone se ho maqsud hasil ghair-mumkin hai
chalo ab sham.en bhi bujhne lagin gor-e-ghariban ki
‘safir’ ik ḳhvab thi ye chand roza zindagi apni
ajal se mil ga.i ta.abir is ḳhvab-e-pareshan ki
Leave a Reply