baḌhe chalo ki thakan to nashe ki mahfil hai
abhi to duur bahut duur apni manzil hai
ye be-qarar tabassum tire labon ka fusun
yahi to chak-e-gareban ki pahli manzil hai
kisi ka raaz to phir bhi para.i baat hui
ḳhud apne dil ko samajhna bhi saḳht mushkil hai
kisi ne chand pe lahra diya hai parcham-e-vaqt
koi hamari tarah sahl jis ko mushkil hai
ik abshar pe manind-e-barg-e-avara
koi maqam hai apna na koi manzil hai
Leave a Reply