baDh Rahi Hai Dil Ki dhaDkan Aandhiyon Dhire Chalo

baḌh rahī hai dil kī dhaḌkan āñdhiyoñ dhīre chalo

phir koī TuuTe na darpan āñdhiyoñ dhīre chalo

ye chaman saarā kā saarā āj-kal ḳhatre meñ hai

har taraf hai aag dushman āñdhiyoñ dhīre chalo

ek yug ke ba.ad bādal kā nayā āñchal milā

ḳhush bahut hai aaj sāvan āñdhiyoñ dhīre chalo

likh rahī hai ḳhushbuoñ ko ḳhat kamal kī pañkhuḌī

khil uThā hai jhiil kā man āñdhiyoñ āñdhiyoñ dhīre chalo

saarī sāñseñ āñdhiyāñ haiñ aur maiñ murthal kī ret

aur baḌh jaatī hai uljhan āñdhiyoñ dhīre chalo

saath in pachhuā havāoñ kā bahut achchhā nahīñ

kah rahā purvā.ī kā man āñdhiyoñ dhīre chalo

ye jo phūloñ kā nagar thā is meñ hī kāñToñ se ab

bhar gayā har ek āñgan āñdhiyoñ dhīre chalo

jag ga.e to zahr bhar deñge fazāoñ meñ ‘kuñvar’

khul na jaa.eñ saañp ke phan āñdhiyoñ dhīre chalo

Leave a Comment