baḌh ga.iin gustaḳhiyan meri saza ke saath saath
pyaar aata hai tiri jaur-o-jafa ke saath saath
zo.af se rah-e-mohabbat men qadam uThte nahin
paanv jamte hain zamin par naqsh-e-pa ke saath saath
chhuT kar kunj-e-qafas se nik.hat-e-gul ki tarah
ham bhi uḌ kar ja.enge bad-e-saba ke saath saath
sard aahon se phunka jaata hai siine men jigar
atish-e-gham tez hoti hai hava ke saath saath
mere aansu bhi bahe josh-e-mohabbat men ‘aziz’
mere naale bhi rahe meri dua ke saath saath
Leave a Reply