Khurshid Talab
bala se koi kahe din ko raat chup rahna
tum apne honTon pe rakh lena haat chup rahna
kahin pe kuchh bhi nazar aa.e puchhna mat kuchh
kabhi nikalna agar mere saath chup rahna
ḳhuda ne baḳhsha hai kya zarf mom-batti ko
pighalte rahna magar saari raat chup rahna
tumhare sar pe bagule bhi aa ke chiḳhenge
magar bhulana nahin meri baat chup rahna
tumhari chiḳh tumhen be-panah kar degi
shikari kab se laga.e hai ghaat chup rahna
zaban taalu men paivast kar ke rakhna ‘talab’
koi mazaq hai kya ta-hayat chup rahna
Leave a Reply