Baal Bikhere Aaj Pari Turbat Par Mere Aaegi

baal bikhere aaj pari turbat par mere aaegi

maut bhi meri ek tamasha aalam ko dikhlaegi

mahv-e-ada ho jaunga gar vasl men vo sharmaegi

bar-e-khudaya dil ki hasrat kaise phir bar aaegi

kahida aisa huun main bhi DhunDa kare na paegi

meri khatir maut bhi meri barson sar takraegi

ishq-e-butan men jab dil uljha diin kahan islam kahan

vaaiz kaali zulf ki ulfat sab ko raam banaegi

changa hoga jab na mariz-e-kakul-e-shab-gun hazrat se

aap ki ulfat iisa ki ab azmat aaj mitaegi

bahr-ayadat bhi jo na aenge na hamare balin par

barson mere dil ki hasrat sar par khaak udaegi

dekhunga mehrab-e-haram yaad aaegi abru-e-sanam

mere jaane se masjid bhi but-khana ban jaegi

ghafil itna husn pe ghurra dhyan kidhar hai tauba kar

akhir ik din surat ye sab mitti men mil jaegi

aarif jo hain un ke hain bas ranj o rahat ek ‘rasa’

jaise vo guzri hai ye bhi kisi tarah nibh jaegi

Leave a Comment